Штогод у першую нядзелю верасня наша краіна адзначае Дзень беларускага пісьменства. Ён праводзіцца для папулярызацыі лепшых традыцый нацыянальнай культуры, друкаванага слова, духоўнасці беларускага народа. Праходзіць у гістарычных і культурных цэнтрах, з якімі непарыўна звязана жыццё вядомых дзеячаў мастацтва краіны. У гэтым годзе вялікі рэспубліканскі фестываль прымаюць 6 верасня Бялынічы.
Першы Дзень беларускай пісьменнасці адбыўся ў 1994 годзе ў Полацку. Потым сталіцамі свята былі такія гістарычна значныя культурныя цэнтры краіны як Тураў, Навагрудак, Нясвіж, Орша, Пінск, Заслаўе, Мсціслаў, Мір, Камянец, Паставы, Шклоў, Барысаў, Смаргонь, Хойнікі, Ганцавічы, Глыбокае, Быхаў, Заслаўе, Шчучын, Рагачоў.
У 2017 годзе сталіцай свята, прымеркаванага да 500-годдзя беларускага кнігадрукавання, зноў стаў старажытны Полацк – родны горад беларускага асветніка і першадрукара Францыска Скарыны.
Юбілейны, дваццаць пяты па ліку, Дзень беларускага пісьменства ў 2018 годзе прыняў горад Іванава Брэсцкай вобласці. Галоўным лейтматывам святочных мерапрыемстваў стала тэма «Мая малая радзіма». На свята прыехала больш за 12 тысяч гасцей з 12 краін свету.
У мінулым годзе Дзень беларускага пісьменства прымаў горад Слонім Гродзенскай вобласці – адзін з самых старажытных на беларускай зямлі, старадаўні цэнтр культурнага і духоўнага жыцця. У дні свята на цэнтральнай плошчы горада ўрачыста адкрылі помнік легендарнаму Льву Сапегу – дзяржаўнаму і ваеннаму дзеячу, дыпламату і палітычнаму мысліцелю, аднаму са стваральнікаў Статутаў Вялікага княства Літоўскага.
Цэнтральнымі падзеямі фестывалю пісьменства ў Слоніме сталі ўрачыстыя цырымоніі адкрыцця і закрыцця, а таксама ўзнагароджвання пераможцаў Нацыянальнай літаратурнай прэміі. Двухдзённая культурная праграма была насычана мерапрыемствамі і сустрэчамі. Прайшлі Фестываль кнігі і прэсы, падагульняючы этап Рэспубліканскага конкурсу юных чытальнікаў «Жывая класіка». Беларускія і замежныя пісьменнікі абмяркоўвалі актуальныя пытанні сучаснай кніжнай справы за круглым сталом.
Сталіцай фестывалю нацыянальнага слова ў гэтым годзе стануць Бялынічы – старажытны «горад белых начэй», радзіма вядомых творчых асоб, «паклоннае месца» хрысціян Беларусі і свету. Дарэчы, як і Слонім, стагоддзі таму горад над Друццю таксама знаходзіўся пад апекаваннем канцлера Льва Сапегі.
Селета ўдзельнікаў і гасцей чакае незабыўная і яскравая праграма: будуць працаваць тэматычныя экспазіцыі, прэзентацыі і інтэрактыўныя пляцоўкі; пройдзе выстава-продаж кніг, царкоўных рэчаў, мёду, царкоўнага печыва і сувеніраў; выстава нацыянальных літаратур нацыянальна-культурных аб’яднанняў; навукова-практычная канферэнцыя «Бялыніцкія чытанні»; будзе арганізаваны паказ-дэфіле беларускіх калекцый «Беларускія спадарыні» і шмат іншага.
ААТ «Белшына» таксама стане ўдзельнікам гэтага фестывалю – прадставіць на ім тэматычную экспазіцыю, прысвечаную гісторыі і сучаснаму развіццю нашага прадпрыемства. Асобае месца на ей будзе адведзена нашаму карпаратыўнаму выданню, бо на старонках газеты ўсебакова асвятляецца жыццё «Белшыны», журналісты з дня ў дзень на старонках выдання пішуць летапіс акцыянернага таварыства.
Аляксандра КАЛIНIНА (office@shinnik.by)